Etxean hilik aurkitu duten eskoriatzarren kasua sumariopean dago eta autopsia egiten dihardute

Maialen Regueiro 2020ko uzt. 13a, 11:14
Ertzaintzako langileak Eskoriatzako Intxaurtxueta auzoko 33. atarian

44 urte zituen, atzo, Eskoriatzako Intxaurtxueta auzoko 33. atariko etxebizitzan hilik aurkitu zuten gizonezkoak. Osasun sailak adierazi duenez kasua sumariopean dago eta autopsia egiten dihardute, heriotzaren kausak zeintzuk izan diren argitzeko.

Auzitegiko medikuak adierazi zuen atzo eskoriatzarraren heriotza kausa naturalengatik izan zela, baina Osasun sailak jakinarazi du autopsia egiten dihardutela, oraingoz, COVID-19ren ondorioz hil denik ezin baitute konfirmatu.

Hotela tabernako arduradunak –koronabirusaren PCR proban positibo eman zuen– "atsekabea" adierazi du, 44 urteko eskoriatzarraren heriotza dela-eta: "Harriduraz eta atsekabez jaso dugu albistea. Badirudi zapatu gauean, alabari esan ziola, arnasteko arazoak zituela, baina ospitalera joan beharrean, igandean medikuari deitzeko asmotan geratu zen".

"Jarraipenik ez"

Hotela tabernako arduraduna eta haren bikotekideak eman zuten positibo joan den eguenean eta bizi duten egoeraren berri eman du: "Positibo eman nuela jakin nuenetik ez didate jarraipenik egin, gaur arte. Suposatzen da positibo eman duten herritarrei telefono bidezko jarraipena egin behar zaiela egunero, sintomak dituzten eta nola dauden jakiteko".

Doluminak

Joxerra Zubizarreta Eskoriatzako alkateak, doluminak adierazi dizkio eskoriatzarraren familiari, atzoko heriotzarengatik.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak