Beste mundu bat posible dela aldarrikatzen hogei urte bete ditu Eskoriatzako Aste Zapatistak, baina aurten ez da ohi moduan ospatzea posible izan. Hala ere, inoiz baino gehiago eragin gura dute gizartearen kontzientziak piztean.
Aurtengo edizioan zenbait pankarta jarri dituzte herriko hainbat gunetan, eta, horrekin batera, janari bilketa jarri dute abian, egoera zaurgarrian dauden Eskoriatzako 13 familiari laguntzeko. Eta, honekin batera, bideo bat egin dute urte hauetan guztietan lagundu dieten guztiei eskerrak emateko [Zapaturako ikusgai izango da].
Hogei urtean, urtero-urtero, Eskoriatza kolorez jantzi dute, hainbat hitzaldi, erakustaldi, haurrentzako tailer, musika kontzertu eta ipuin kontaketa antolatuz, besteak beste. Gainera, Chiapasko zein beste zenbait herrialdetako hainbat proiektu eta bertako komunitateen errealitateak ezagutarazten ere aritu dira. "Hitzaldi ugari egin ditugu hogei urtean: Ayotzinapan desagertutako 43 ikasleetako baten gurasoekin bideo-dei bidezkoa, Wallmapu Euskal Herria Elkarteko Iban Gartziarekin herri maputxeez, aldaketa klimatikoaz, sexualitateaz… Hala ere, Eskoriatzako Aste Zapatistak zapatismoa ardatz hartzen du, baina gure herrian eta inguruan eragiteko. Hala, egoera hau da kontzientziak pizteko unea; ea benetan hartzen dugun inguruko ardura…", adierazi dute EskoZap elkarteko kideek.
Janari bilketa
Martitzenean, beharra duten pertsonei laguntzeko janari bilketa jarri zuten martxan Coviran eta Eroski dendetan. Hala, janaria uzteko kaxa berezi batzuk jarri dituzte, eta ekainaren 17ra arte egongo dira. Batutako janaria, berriz, beharra duten Eskoriatzako 13 familiaren artean banatuko dute, Caritasekin elkarlanean.
20 urte iruditan
20. urteurrena ospatzeko ikusentzunezkoa ere egin dute EskoZap elkarteko kideek. Urte hauetan egindako zenbait ekintza eta kartelak batuta bideo motz bat egin gura izan dute; hala, bide batez, urte hauetan guztietan astea antolatzen lagundu dieten eragile, elkarte eta norbanakoei eskerrak emanez: "Oso zaila da gure alboan beti egon diren guztiei eskerrak ematea. Rosa Sanchez bakarlaria, Durangoko Marilu eta Rafa herri bazkari mexikarra antolatzen urtero izan direnei, Alaitzen taldeari gurekin batera Jose Arana egoitzako egoiliarrak paseoan atera eta beraien kantuekin herriko nagusiei irribarre bat ateratzearren…".
Iurre Romaretazabala, 25 urtez Chiapasen laguntzen
Mexikoko Chiapasko zenbait proiektutan haziak loratzen aritu da 25 urtez Iurre Romaretazabala eskoriatzarra. Urtero joaten da, lau hilabetez, hango indigena eta atzerritarrei laguntza ematera; azaroan irten eta otsailean bueltatu.
Bertako zenbait komunitate, kolektibo eta elkartetako proiektuetan laguntzen aritu da, eta urte hauetan fruituak ere batu izan ditu: "Aste Zapatista antolatzen 20 urte egin ditugu, eta nik 25 urte daramatzat, urtero, Chiapasera joaten. Ahal izan dudan laguntza guztia ematen saiatzen naiz, eta hemendik eramaten dudan laguntza ere ezinbestekoa da beraientzat. Hala, Eskoriatzarekiko maitasun handia dute hangoek. Hemendik helarazten diegun laguntza ekonomikoarekin eta elkartasunarekin aurrerapauso handiak eragiten dizkiegu beraien bizitzetan".
