Egunarekin bat egin nahi duen eskoriatzar orok honako hau egin beharko duela adierazi dute: "Herritarrak mendiko botak jantzi, motxila hartu eta Atxorrotx mendira igo beharrean, 12:25ean, leiho eta balkoietara mendiko arropak jantzita ateratzeko gonbidapena egin nahi diegu herritarrei. 12:30ean, berriz, kanpai hotsak entzungo direnez, horrekin batera, Ikusi mendizalea euskal abesti herrikoia kantatuko dugu. Amaitzeko, aldiz, leiho eta balkoietan poteoa egiteko proposamena egiten dugu".
Ikurrinak eta marrazkiak
Horrekin batera, Atxorrotx mendiko eguna dela argi eta garbi adierazteko ikurrinak eta marrazkiak leiho eta balkoietan zintzilikatzeko dei ere egin dute antolatzaileek. Marrazkiei dagokienez, Karmelo Oñate ilustratzaile eta marrazkilari eskoriatzarrak Atxorrotx mendiko hiru marrazki eredu egin ditu haurrek koloreztatzeko. Eta hauek San Pedro Intxaurtxuetako Jaiak Facebook orrialdetik deskargatu eta inprimatu daitezke. Atxorrotx mendiko marrazkien ereduak inprimatu ezin dituenak, berriz, aukera izango du hauek jasotzeko Eroski, Coviran, Mapfre, Ogiberri eta Zarus gozoki dendan.
Sare sozialak bete nahian
Atxorrotx Eguna dela adierazteko, gainera, #AtxorrotxEguna2020 traola erabilita, Atxorrotx mendiko argazkiak Whatsapp, Facebook, Instagram… hainbat sare sozialetara igotzeko dei ere egin gura izan dute antolatzaileek.
