Martitzenean, Auzoko Eskoriatzako Iratxe Arrese dinamizatzailea eta taldeko bi auzotar eta beste hiru auzokide izan ziren Huhezin, Humanitate eta Hezkuntza Zientzien Fakultatean, beraien esperientzia partekatzen eta proiektuaren nondik norakoak azaltzen.
Eskoriatzako dinamizatzaileak adierazi zuenez, interesa piztu zien ikasleei Auzoko proiektuak: "Atzerriko hizkuntzak lantzen ari diren ikasleen tutoreengandik jaso genuen gonbidapena, eta, hala, hirugarren mailako ikasleekin izan ginen martitzenean, egiten duguna zer den azaltzen. Taldean urteak daramatzaten bi auzotar –Dorleta Lezeta eta Marije Uribe– eta Brasil, Siria eta Marokotik etorritako hiru auzokide joan ginen bertara, eta ikasleei, beraien herrietan dituzten Auzoko egitasmoetan parte hartzeko animatu eta dituen onurak transmititu dizkiegu. Izan ere, atzerritik datozenek ikasten duten arren, Auzokon parte hartzen duten auzotarrek ere askotariko hizkuntza eta ohiturak ikasteko aukera izaten dute."
Jolasak eginda, ikasi
Hori horrela, ikasleekin egindako saioan, jolasak egiteko aprobetxatu zuten: "Irudi bidezko jolasak egin genituen. Gurekin etorri diren auzokideek euskarazko zenbait hitz eta nola ahoskatzen diren ikasi dute, eta guk, beraienak".
San Blas opilak: ikastaroa
Munduko Janak lelopean bi ikastaro antolatu ditu orain arte Auzoko Eskoriatzak. Bietan, atzerriko jakiak egiten ikasi dute bertaratu direnek, eta oraingoan, berriz, Euskal Herriko jaki bat egiten ikasteko aukera izango da; hain zuzen ere, San Blas opilak.
Otsailaren 13an, eguena, 18:00etan, kultura etxean izango da ikastaroa, eta Eskoriatzako Talogile Elkarteko Miren Diaz de Gereñuk gidatuko du. Plazak mugatuak izanda, aurrez eman behar da izena, 661 74 63 76 telefono zenbakira deituta.
