Erromatarren bizitza Eskoriatzara zabalduz

Imanol Beloki Unamuno 2018ko eka. 13a, 14:44
Cohors Prima Celtiberorum elkarteko kideek erromatarren bizitza ekarriko dute Eskoriatzara.

Zapatuan, Cohors Prima Celtiberorum elkarteko kideek erromatarren bizitza ekarriko dute Eskoriatzara. 11:00etatik aurrera, Ibarraundi kanpoaldean, legionario talde baten larruzko denda erreplika izango da, garaiko armak eta tresnak, besteak beste.

Zapatuan, 11:00etatik aurrera, Bizi Erroma ekimena gauzatuko da Ibarraundi museoaren kanpoaldean. Bertan, Erromatar Berantiar garaiko kanpamentu bat muntatuko dute, legionario talde baten larruzko denda erreplika bat eginda. Gainera, denda ondoan, garaian erabiltzen ziren armak, tresnak eta bestelako gailuak egongo dira ikusgai. Hala, beraien egunerokoa, egiten zituzten entrenamenduak eta ohiturak ikusi ahal izango dira, eta bertaratzen direnek azalpenak jasoko dituzte.

Era fidelenean berreraikiz

Cohors Prima Celtiberorum elkarteak, Erromatar Berantiar garaiko historia eta ondare historikoa, ikertzea, hedatzea, berreskuratzea eta berreraikitzea du helburu –Kristo ondorengo III. mende bukaeratik V. mendera arte–. Horretarako, berreraiketa historikoaren bitartez, erromatar garaiko ohiturak, janzkera eta bizimodua ahalik eta era fidelenean berreraikitzen dituzte, arkeologi-aztarnek eta garaiko hainbat iturrik eskainitako informaziori esker.

Garaiko janzkeraz gain, taktika militarren erakusketa eta azalpena eskainiko dute. Erromatar unitate militarrek Antzinaroan erabiltzen zituzten babeserako eta erasorako hainbat mugimendu militar ikusteko aukera izango da.

Hainbat ekintza

Abiapuntutzat Atxorrotxeko indusketetan aurkitu diren Erromatar garaiko aztarnak izanda, Cohors Prima Celtiberorum elkartearen lana eskoriatzarrei eta interesa duen edozeini erakustea da asmoa. Honela adierazi du Oscar Escribano Txapelek, Cohors Prima Celtiberorum elkarteko kideak: "Ezagutza horiek jendarteari helarazten zaizkio ekintza desberdinen bidez: erakusketak, umeentzako tailerrak, jardunaldiak, hitzaldiak, argitalpenak, dokumentalak… parte-hartzaileak iraganaz interesa hartzera eta gozatzera gonbidatuz".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak