Eskoriatzako bandak ez du inoiz Aratusteetan kontzerturik eskaini. Hala, aurten egin duten hausnarketa baten ondorioz, lehen aldiz egitea erabaki dute. Kontzertua otsailaren 9an, egubakoitzean, izango da, Zaldibar antzokian, 20:00etan.
Ibilbide luzea
1980an sortu zuten Eskoriatzako musika eskola Maria Esther Oregik eta Mari Cruz Oiangurenek. Haiekin batera, Angel Bañares eskolak ematen hasi zen bertan. Eskola sortu eta bost urtera, musika eskolako bandako zuzendari aritu da Bañares.
Gaur egun, 30 musikarik osatzen dute banda, eta, gazteek kanpoan ikasten dutelako, motibazio falta dagoelako… beherakada izan dute; hala, 2018ra begira erronka berriak ezarri nahi dituzte. Honela adierazi du Imanol Andetxeagak, Eskoriatzako bandako kideak: "30 urteren ostean, ito egin gara banda osatzen dugun musikariak. Soilik betiko hitzorduetan hartzen dugu parte, bultzada bat behar dugu, ilusioa eta motibazioa pizteko. Hala, epe motzerako erronka banda suspertzea da, eta, epe luzera begirakoa, Angel Bañares zuzendaria ordezkatzea. Guk ondo pasatzeko egutegi berri bat proposatu dugu: Atxorrotx egunean jotzea, dantzaldia egitea, trikitiarekin uztartzea, ipuin musikatuak eskaintzea…".
Zaldibarko emanaldia
Hainbat pieza eskainiko dituzte otsailaren 9ko emanaldian: Television Showcase, Chariots of fire, Ballet Parisien, Tolosako inauterietako kantuak... eta sorpresak ere egongo direla adierazi dute Eskoriatzako Beheko Errota Musika Eskolako kideek. Hala, herritarrei bertaratzeko dei egiten diete.
Bañares-Bengoa familia
Bitxikeria moduan, banda osatzen duten hogeita hamar musikaritik hamar Bañares eta Bengoa familiakoak dira. Imanol Andetxagak adierazi du datu bitxia den arren eta oinarri sendoa duten arren, jende berriaren aldeko apustua ere egin nahi dutela. "Daukagunarekin bizi gara, eta azken urteetan ez da jende berria sartu; hala, ilusioa eta kohesioa mantentzea da gure helburu nagusia gaur egun".
1986ko banda osatzen zutenak
Eskoriatzako Musika Eskolako banda sortu –1985–, eta hurrengo urtean, 1986an atera zuten talde argazkia. Fernando Eskoriatza plazan zegoen musika eskolako eskaileretan ateratako argazkia da.
Argazkikoen izen-abizenak:
