Marijo Pagaldaik dioenez, "udaberria da lurraren sorkuntza" eta sasoi ezinhobea da "barruan daukaguna sorkuntzaren bitartez kanporatzeko". Asmo horrekin taularatu zuten bariku arratsaldean "Udaberria osatuz" ikuskizuna. Dantza, musika eta poesia elkarlotzen dituen emanaldiarekin "gure barruan hasten den mugimendua adieraztea" zen asmoa; "izan ere, barruan izan dezakegun energia hori guztia sorkuntzara bideratzea osasungarria da; askotan agresibitatea da ateratzen zaiguna, baina udaberriak barruko bizipoza erakusteko balio behar digu. Azken baten, udaberriak mugimenduarekin eta kreatibitatearekin lotura dauka, plan berriekin" eta hori guztia kanporatzea izan zen atzoko ikuskizuna.
Emaitzarekin gustura dagoela adierazi digu Marijo Pagaldaik: "oso ondo joan zen eta jendea gustura geratu zen". Gainera "hainbat gauza izatera, batetik bestera pasatzean, arintasuna eman genion saioari. Kreatibitate handia nabari izan zen".
