Isabel Guridiri aipamen berezia egin ondoren eman zioten hasiera saioari. Gai guztietatik esanguratsuena San Pedro auzoa berrurbanizatzeko proiektuan aurreikusitako obrak kontratatazeko espedientea hastea izan zen; baldintza administratiboen agiria onartzea eta obra zein enpresak egingo duen aukeratzeko lehiaketa martxan jartzea. Lehiaketa irekia izango da, eta Gipuzkoako buletinean agertuko da. Enpresek 26 egun izango dituzte proposamenak aurkezteko, eta ondoren, Udalak proposamen guztiak aztertu beharko ditu.
Enpresendako baldintzak
Maiatz inguruan esleituko dute San Pedro auzoko hamargarren atartetik hamasei-hamazazpi zenbakirainoko obra. Hala eta guztiz ere, baldintza batzuk ezarriko dio Udalak obra aurrera eramango duen enpresari. Honela azaldu zuen Beñat Herce alkateak: "Solbentzia tekniko eta ekonomikoa izan behar du enpresak eta horrelako obretan esperientzia izatea eskatuko zaie". Baldintza horietaz gain, Udalak herriko langabe bat kontratatzeko baldintza ere jarriko dio enpresari, eta, hain zuzen, lanak ekainean hastea aurreikusten du Udalak.
Obraren aurrekontua 300.000 euro izango da eta hirugarren fasean egingo diren lanak hauek: espaloia konpontzea, mugikortasuna hobetzea, aparkalekuak berrantolatzea… izango dira, besteak beste.
Axtrokiak ere mintzagai
Aipatu beharreko beste gai bat axtroki izeneko tokiko moneta ezartzeko merkatariekin sinatu beharreko lankidetza hitzarmenaren eredua onartzea izan zen. Axtroki merkatari elkartean dauden komertzioek moneta soziala erabiltzen dute, baina hemendik aurrera merkatari elkartearen kide ez direnek ere erabili ahal izango dute. Hori bai, hitzarmen bat sinatu beharko dute Udalarekin. Hala, axtrokiak erabiltzen dituztenek pegatina bat jarriko dute beraien komertzioetan.