Sanpedroak hasi besterik ez dira egin, eta oraingoz eguraldiak gehiegi lagundu ez duen arren, eskoriatzarrak ez dira etxean geratu. Jaiak kalean gozatzeko dira, eta aterki eta guzti irten behar izan badira ere, herriko jai nagusiak diren Sanpedroak kalean gozatu dituzte.
Atzoko eguna horren erakusle izan zen, arratsalde partean euriak jaiekin bat egin zuen arren, jendeak ez zuen alde egin, eta aterkia eskuan kalean ibili ziren eskoriatzarrak.
Dudarik gabe, txupinarekin batera, eguneko une bereziena nagusien danborrada izan zen. Eskoriatzar gutxi geratu ziren etxean, kaleak jendez bete ziren-eta.