Domeka gauean hasi ziren orain arte erabilitako edukiontzi berdeak, horiak eta urdinak kaleetatik kentzen. Beira jasotzeko iglu berdeak, oihalak eta olio batzeko edukiontziak orain arte bezala kalean egoten jarraituko dute.
Oztopoak
Udaletik azaldu dute badagoela proba martxan egotea oztopatzen saiatzen ari dena, bizilagunaren pegatinak kenduz edo zabor poltsak zintzilikarioetan jarriz, esaterako.
Baina, nabarmendu dute, orokorrean, aparteko arazorik ez dela egon lehen egun hauetan, eta herritarrak normaltasunez ari direla azpiegitura berriak erabiltzen. Hori dela-eta, Udalak eskoriatzarrak zoriondu gura izan ditu egunotan izaten ari duten jarreragatik, eta baita ontzi banaketan izandakoagatik ere.
%80ak jaso du materiala
Azken horren harira, Hondakinen bulegotik jakinarazi dute dagoeneko deitutako etxebizitzen %80ak jaso duela materiala. Komertzioei dagokionez, guztiek hartu dute materiala.
Formazio saioak
Bestalde, lehen egunak samurrak ez direla izaten ari badakite Hondakinen Bulegokoek, zaborrak gaika banatzerakoan zalantza asko sortzen direlako. Hori dela-eta, formakuntza saioak antolatu dituzte. Atzo, eguaztena, goizean egin zuten lehena Ibarraundi museoan. Bigarrena bihar, egubakoitza, izango da, 11:00etan; eta hirugarrena, azaroaren 12an, arratsaldeko seiretan.