Ibarraundi museotik jakinarazi dute plaza atzean utzi eta Huhezi unibertsitaterantz abiatuko direla, handik jaitsiko dira-eta errekara. Hain justu, bertatik Santa Mariñe plazarainoko tartea garbituko dute. Bi ordu inguru emango dituzte horretan, eta amaitutakoan, hamarretakoa egongo da parte-hartzaileendako. Ibarraunditik gaineratu dute errekatik ateratako zaborra Santa Mariñe plazan jarritako edukiontzietan utziko dela.
Araztegira bisita
Bestalde, erreka garbitzeaz gain, Epele araztegia ere bisitatu ahalko da hilaren 19an. Hitzordu bikoitza gertatu dute: 10:30ean euskarazko bisita gidatua hasiko da, eta 12:00etan, gaztelerazkoa. Antolakuntzatik garraio publikoa erabiltzea edo bizikletaz joatea (haraino bidegorria dago-eta) gomendatzen da.
Autobusean joan ezkero, Lurradebusen honako ordutegia kontuan izatea aholkatu da: euskarazko bisitarako 09:45eko autobusa hartzea, eta besterako, 11:15ekoa.