Ibarraundi museoan zegoen hitzordua eginda, eta 11:00ak pasata zirela, 60 lagun inguru heldu dira berdeguneetara; askotariko adinetako eskoriatzarrak batu dira han: bere aulkitxoan bero-bero zeuden haurtxoetatik hasi eta hunkituta zeuden guraso eta aitaita eta amonekin bukatu.
Aitxurrak hartu eta jarraian hasi dira landareak landatzen, euri tantak botatzen hasita zegoen-eta. Aurreko urtean jaiotako haur bakoitzeko zuhaitz bat landatzeko ohitura egon da orain arte. Aurten, baina, hori aldatu behar izan da, Eskoriatza zuhaitzak landatzeko toki barik geratu da-eta. Hala, batzuek, ume bakoitzeko zuhaitz bana jarri duten bitartean, beste askok, ostera, koadrilaka egin dute.
Hori bai, zuhaitza landatu ostean, argazkia atera dute parte-hartzaile guztiek.