Aste honetan teknikariek formakuntza jaso dute prozesua nola eraman behar den jakiteko, datorren astean bilera izango dute herritarrekin azaltzeko zeintzuk izango diren pausuak eta prozesua, eta asmoa da konposta egiteko tokiak ahalik eta azkarren egokitzea. Horretarako, "obra txiki" batzuk egin beharko dira Dorletan eta Zaharren Egoitzako ortuan auzokonposta egiteko tokiak egokitzeko eta hiru enpresetako bati esleituko dizkiote obrak laster. "Hori guztia egindakoan asmoa da urtea amaitu baino lehenago proba pilotuak martxan jartzea" esan digu Ezpeletak.
Eskoriatzan egindako konpostari bi erabilera emateko asmoa dute: batetik, proiektuan parte hartzen dutenek aukera izango lukete konposta hori euren ortuetan-eta erabiltzeko, bestetik, soberan baldin badago, herriko lorategiak-eta kudeatzen dituen enpresari emango zaio aukera konposta erabiltzeko.
Hori guztia, Zero Zabor politikaren barruan doala azaldu digu Ezpeletak eta gaineratu Atez Atekoa baino gehiago dela Zero Zabor filosofia.
Proiektua zabaltzeko asmoa
Ezpeletak hauxe gaineratu du: "Proba aitzindariak ondo ateratzen badira, nahiko genuke herrian auzokonposta egiteko puntu gehiago jartzea eta herritar gehiago biltzea prozesura".