Amuska orain dela 21 urte eratu zen elkarte moduan, baina aurretik herriko hainbat emakume antolatuta zeuden izen horrekin. Gaur egun elkarteak 145 bazkide dauzka; gazteenak 33 urte izango ditu eta nagusienak 80 inguru.
Emakumeen aisialdia antolatu
Elkarteko arduradunek hasierako asmo berberekin jarraitzen dute: emakumeek aisialdia lantzeko eta antolatzeko baliabideak eta aukerak ematea.
Dena dela, elkartekoek beti argitu dute eurek antolatutako ekintzetan gizonezkoek ere esku hartu dezaketela. "Lehentasuna bazkideek dauzkate, baina gizonak ere ongietorriak dira, jakina", azaldu zuten.
Herriko eragile esanguratsua
Bestalde, nabarmendu beharra dago Amuskak esku-hartze handia izaten duela udalerrian egiten diren ospakizun eta ekitaldi berezietan: Danborradan, Olentzeron, Erretiratuen jaian, Urdelardero Egunean, Aste Zapatistan eta abar... "Udalarekin elkarlanerako hitzarmen bat adostuta daukagu eta horrez gain laguntza eskatzen diguten guztietan esku hartzen dugu".
Are gehiago, udalerrian egiten diren ikastaro gehienak antolatzen ibiltzen dira.
Hala, ikastaroei dagokionez, Amuskak prest dauka ikasturte honetarako ikastaro eskaintza. Astelehena eta martitzena izango dira izena emateko egunak. Interesatuek kultura etxera jo beharko dute 18:00etatik 19:30era bitartean.
Aurten honako ikastaroak antolatu dituzte: ehoziriak eta bainika, olio-pintura, eskulanak, antzerkia eta patchwork. Azken hori, gainera, aurtengo berrikuntza da. Iaz, berriz, antzerkia lehenengo aldiz egin zuten eta aurten errepikatu egingo dute.
Horrez gain, berbaldietarako ideia ugari dituzte eta horren finantzazioaren zain daude. Txangoei dagokionez, urriaren 25ean Santanderko El soplao kobak ikustera joango dira, eta martxoaren 8an ere beste ibilaldi bat egingo dute.