Etxebizitza Mendizaleen plazan dago. Herritarrek mediku-etxea izenez ezagutzen dute eta Udalak 2020. urte amaieran eraberritu zuen. Etxebizitzak hiru logela ditu eta logela bakoitzeko errentamendu-kontratu bana sinatuko da.
Ekimenak bilatzen du Elgetako gazteek emantzipatzeko eta herrian bertan etxebizitza alokatzeko dituzten zailtasunei aurre egiten laguntzea. "Gazteei bideratutako alokairu partekatuko etxebizitza izatea nahi dugu. Urteotan beste premia batzuk izan dira eta ezin izan da proiektua gauzatu, baina etxebizitza libre gelditu da eta deialdi publikoa egin dugu, hiru gazteri baldintza justuetan emantzipatzeko aukera emateko", azaldu dute udal arduradunek.
Etxebizitza komunitarioa
Alokairuaren prezioa izango da gaztearen diru-sarreren %15 –gutxienez 90 euro–, eta prezio horren barruan sartuko dira argindar zein ur gastuak. Udalak ordainduko ditu, "baldin eta kontsumoa arduratsua bada".
Bestetik, gehienez ere bi urterako alokairu kontratuak izango dira, itxarote-zerrendan inor ez badago hiru urtera arte luzatu ahalko direnak.
Udalak urtarrilean egin zuen ekimena eta etxebizitza interesa duten gazteei erakusteko saio irekia.