Martxoaren 19tik 29ra ibiliko da herriz herri 24. Korrika; Atharratzetik abiatuko da eta Bilbo izango du helmuga. Ez da orain bi urte moduan Elgetatik pasako, baina elgetarrek Elorregi eta Bergara arteko tartean izango dute kilometroa. Horrela erabaki zuten Elgetako Korrika batzordea eratzeko martitzenean egindako batzar irekian. Udalak diruz lagundutako kilometroa izango da eta Bilbora iritsi aurreko egunean –martxoaren 28an– izango da Korrika Debagoienean. Elgetarren kilometroari dagokionez, ez dago zehaztuta zein izango den, baina 06:15 eta 06:52 artean izango da.
Bien bitartean, herri mailako ekintzak dinamizatzea da asmoa. Uxue Igarza eibartarrak gidatuko ditu batzordeko bilerak.
Batzarra otsailaren 10ean
Lantaldeak otsailaren 10ean egingo du hurrengo batzarra, eta herriko eragileak eta norbanakoak parte hartzera deitu dituzte. Batzarra 18:00etan izango da, udaletxean. "Oraintxe hasi gara lanean", azaldu du Uxue Igarzak. "Lehen bileran hainbat ideia irten ziren –Korrika Eguna egitea, esaterako–, baina lanketa hasi berri dugu eta dena dago zehazteko". Gehitu du otsailaren 6an Korrikako materiala erosteko postua egongo dela Elgetan.