Iaz moduan, Elgetako hiru bolatoki ezberdinetan jokatuko da boleta-maratoia. Zapatuan, abuztuak 30, jokatuko da Zabaleta auzoko bolatokian (12:00), Salbadorkoan (17:00) eta Elgetakoan (20:00). Ez da ohikoa egun berean hiru bolatoki ezberdinetan jokatutako boleta-maratoia antolatzea; izan ere, hiru bolatoki prestatu behar dituzte egun bererako.
Bestetik, erronka polita da bolariendako. Ezaugarri ezberdinetakoak dira hiru bolatokiak eta bolari trebea izan behar da hiruretan marka ona egiteko. Boleta-maratoiak interesa piztu zuen iaz –30 parte-hartzaile izan ziren–, eta aurten ere horrela gertatzea espero dute antolatzaileek.
Sariak ere iragarri dituzte. Aurreneko bost bolari onenendako sariak egongo dira. Txapeldunak txapela, 150 euro eta bola eskuratuko ditu; bigarrenak, berriz, 75 euro eta urdaiazpikua. Hirugarrenak 50 euro eta gazta; laugarrenak, bi lagunendako bazkaria Elgetako Bolatoki tabernan eta, bosgarrenak, ortuko sorta eder bat. Horrekin batera, bolatoki bakoitzeko saria honakoa izango da: jasotakoaren %40 bolari onenarendako, %30 bigarren sailkatuarendako eta %20 hirugarren onenarendako.
Bazkarirako izen-ematea
Gaur da Zabaleta auzoan egingo den bazkarian izena emateko azken eguna. Bazkaria 14:00etan izango da. Interesatuek Elgetako Bolatoki tabernan eman behar da izena. Menua da: errusiar entsalada, oilaskoa, postrea eta edariak. Prezioa 20 euro da.
Iazko boleta-maratoiaren kronika hemen.