Eguenean lehertuko da festa Elgetan, eta lau egunez kolorez jantziko da herria Ferixa Nagusiko jaiak ospatzeko. Adin guztietako herritarrek izango dute zertaz gozatu, eta jaiak ofizialki arratsaldeko mozorro jaitsierarekin hasiko badira ere, Udal Gobernuak 11:00etan bisita egingo die Eguneko Zentroko erabiltzaileei, jaien hasieraren berri emateko.
Eguerdian, berriz, udalekuetako umeen ongietorria egingo diete jaietan egunero kalean ibiliko diren buruhandiei, eta udalekuetako koordinatzaile Nerea Villak aurreratu du gutxienez hiru euskal dantza egingo dituztela haurrek.
Fantasiazko kalejira
Mozorro jaitsiera egingo dute, festak hasteko, Salbador kalean behera herriko trikitilariek eta Burrunbazale txarangak lagunduta, eta aurten, herritarrek bozketa bidez erabakita, Fantasia da mozorro-gaia. Mozorro onena sarituko dute txosnetan.
Lau egunez Leiane Valle izango da alkate txikia, eta hura arduratuko da bidea zabaltzeaz. Ibon Unzetabarrenetxea alkateak aurreratu du alkate txiki izan gura dutenen artean zozketa egiten dutela: "Ilusio handiz hartzen dute kargua".
Umeak protagonista
Egubakoitzean izango da Haurren Eguna, eta, urtero bezala, umeendako jolas-parkea egongo da. Puzgarriak, ohe elastikoak eta zezen mekanikoak egongo dira, besteak beste, eta Elgetako alkateak aurreratu du "bero handia" egiten badu ur jolasak ekarriko dituztela. Umeen bazkaria 14:00etan egingo dute, eta txartelak salgai daude, Janelan.