Pozik dira Fernando Larrañaga, Txema Barrutia eta Manolo Cainzos. Elgetarrek lagatako 170 argazki elkartu dituzte argazki erakusketa egiteko eta bisitari asko izan dituzte.
Erakusketak eguenean zabaldu zituen ateak eta domekara arte egon da ikusgai. Kalkulatzen dute 450 lagun inguru pasa dela bertatik lehen asteburuan. "Oso-oso egun politak izan dira. Jende asko etorri da eta eskerrak eman dizkigute egiten ari garen lanagatik", azaldu du Larrañagak.
Erakusketan, batez ere, familia argazkiak daude ikusgai; ezkontzak, bazkariak, ospakizunak, familia argazkiak... "Sarreran jarri ditugu argazkiak ekarri dituztenen izenak eta jendea harritu egin da zenbat diren. Hori ikusita, bada jendea argazki gehiago ekarri dituena hurrengo erakusketa batean ikusgai jartzeko".
Bigarren asteburua
Aste bukaera honetan ere ikusgai izango dira argazkiak; eguenetik domekara ohiko ordutegian. Larrañaga, Barrutia eta Cainzos bertan izango dira jendeak egindako ekarpenak jasotzeko. "Laguntza handia ari gara jasotzen. Herritarrak oso lagungarriak dira informazioa osatzeko eta hartu behar dugu kontuan argazki horiek guztiak Udal artxiboa aberasteko izango direla. Oso eskertuta gaude".
