Aintzane Iturbek artatuko ditu herritarrak eta Elgetako udaletxean izango da eguenetan 09:00etatik 13:00etara. Era berean, telefonoz eta e-mailez informazioa eta aholkularitza eskaera egiteko aukera ere egongo da, 747 48 51 47 telefono zenbakira deituta edota energiabulegoa@debagoiena.eus helbidera idatzita.
Askotariko informazioa
Bulegoak honako gai hauei buruzko arreta emango du: elektrizitate eta gas fakturetan agertzen den informazioa azaldu eta ulertarazten laguntzea; merkatu arautuan eta librean dauden aukerei buruzko informazioa ematea; datu historikoetan oinarrituz, horniketa bakoitzari dagokion potentzia optimoa aztertzea; etxean instala daitezkeen energia berriztagarrien inguruko informazioa ematea; etxebizitzaren birgaitze energetikoari buruzko gaietan aholkatzea; eta laguntza ekonomikoak lortzeko aukerak dauden aztertzea (bonu sozialak, GLL eta bestelakoak).
