Sortzaile sena txikitatik datorkizu?
Bai; beti esan didate txikitatik hasi nintzela sortzen. Marrazkien bitartez, hain zuzen. Esan daiteke nire amari esker hasi nintzela; izan ere, hark erakutsi zidan margoak nola erabiltzen ziren.
Youtuben ere ibiltzen zara; zer nahiago duzu, vlog-ak [pertsona baten bizitzako esperientziak era- kusten dituzten bideoak] egitea ala diseinuak sortzea?
Biak. Youtubeko vlog-ak beste mota bateko diseinu bide bezala hartzen ditut. Grafiko asko erabiltzen ditut eta bideoen azalak ere nik diseinatzen ditut.
Zergatik Isaack-en egunerokoa [Izarren Youtubeko kanala]?
DBHn sare sozialen erabileraren gaineko hitzaldi bat izan genuen, eta esan ziguten gure informazio pertsonala ez emateko. Hortaz, Instagram lehenengo aldiz deskargatu nuenean, Isaack Roosevelt izena aukeratu nuen, gustuko nuelako eta nire benetako izena ez erabiltzeko. Ordutik hona, sare sozial gehienetan erabiltzen dut izen hori.
Hainbat hizkuntzatan aritzen zara, gainera; trebea zara?
Euskaraz eta gaztelaniaz egunerokotasunean ibiltzen naiz; gainera, ingelesez ere nahiko trebea naizela esango nuke, hizkuntza horretako edukia kontsumitzen dudalako. Txinerazko eta koreerazko edukiak ere ikusten ditut, eta hizkuntza horiek ere lantzen ari naiz.
Euskara ikastea txinera ikastea baino zailagoa dela diote askok.
Ados nago esate horrekin. Txinerazko gramatika oso erraza da euskarazkoarekin alderatuta. Hizkuntza bakoitzak bere erraztasunak eta zailtasunak ditu. Txineraz zailtasun handienetakoak idazkera eta ahoskatzea dira, nire ustez. Euskaraz ahoskatzea ere ez da erraza askorentzat, baina, idazkera hizkuntza askok partekatzen duten alfabetoarekin denez, errazagoa da.
Hego Korean izan zinen ikasturte batez; hango kulturako ezer igartzen duzu faltan?
Jana, aisia eta ordena. Ez naiz edari alkoholdun zalea eta kafetegiak asko gustatzen zaizkit; han asko daude eta hemen baino edari-mota gehiago dute. Jana ere asko gustatzen zait, eta hango platerak kozinatzen saiatzen naiz. Ordenari dagokionez, garraio publikoetan, adibidez, ilaran itxaroten dute, ezer esan gabe; hemen, berriz, askotan, kaotikoa izaten da.
Txina bisitatuko duzu?
Aurtengo udan joatekoa nintzen, baina, azkenean, Australiara joango naiz, working holiday egitera [herrialde batera bidaiatu, han lan egiteko]. Hala ere, etorkizunean joateko asmoa dut.
MOTZEAN
Youtuber bat. Dianxi Xiaoge.
Bidaiatzeko toki bat. Asia.
Janari gustukoena. Arroza, edozerekin.
Abesti bat. One Ok Rock-en We are.
Kafea nola? Kafesnea.
Pelikula bat ikustea ala liburu bat irakurtzea? Biak gustatzen zaizkit.
