Liburutegiak antolatutako ipuin kontalaritza saio batekin emango zaie gaur hasiera Martxoaren 8ko Elgetako ekintzei. Ameli izen artistikoarekin ezaguna den Amaia Elizagoien Varela oronoztarrak egingo du saioa, 18:30ean. Euskal Herrira bizitzera etorritako hiru emakume migratzaileren eta bertan sortu den emakume baten istorioak ekarriko ditu Elizagoienek. "Bizi-esperientziak dira, gure ikuspuntua aldatuko duten gertaerak", aurreratu du. Helduendako saioa da; 16 bat urtetik gorakoendako.
Zumba saioa eta manifestazioa
Biharko, Martxoak 8, zumba saioa eta manifestazio iragarri dituzte Amantalak talde feministako kideek eta Udalak. Zumba saioa 11:30ean hasiko da, plazan, eta ordubete iraungo du. Herriko emakume zein neska gazteei bereziki zuzenduta dago, eta Ibone Ramos elgetarrak gidatuko du. Arropa erosoa eta ura eramateko gomendatu dute antolatzaileek. Jakinarazi dute eguraldi txarra bada kiroldegira lekualdatuko dutela saioa. Horrelakorik baldin bada, Amantalak talde feministaren sare sozialetan jakinaraziko dute.
Ondoren, manifestazioa dago deituta 13:00etarako. Faxismoan kontra, aliantza feministak borrokan lelopean deitu dute mobilizazioa. Herriko plazan emango diote hasiera elkarretaratzeari, eta, jarraian, manifestazioa egingo dute. Ibilbidea honako hau izango da: Salbador kaletik igo, Berraondokuatik jaitsi, Domingo Iturbe kalea zeharkatu, San Roke kaletik jaitsi eta herriko plazan amaitu.
Antolatzaileek ekitaldietan parte hartzeko dei egin diete elgetar guztiei.
