Badira urte batzuk egitasmoa mahai gainean dela eta eskolako langileekin, gurasoekin eta udal ordezkariekin osatutako Jangela Eraldaketa batzordea ere martxan dela. Orain arteko ibilbidearen errepasoa egitea eta aurrera begirako erronkak zehaztea izango dira batzarreko bi puntu nagusiak. "Proiektuaren zirriborroaren planoak ikusi ahal izango dira. Nola gelditzea aurreikusten den jakiteko aukera izango da", azaldu du Hezkuntza zinegotzi Kepa de Vegak.
Jangelak sukalde zerbitzu propioa izatea da Elgetako hezkuntza komunitatearen nahia, eta kafe antzokiko sukaldea erabiltzea litzateke planteamendua.
Hamaiketako osasungarria
Lanketa nagusia hori izanda ere, Jangela Eraldaketa batzordeak beste hainbat proiektu garatu ditu bidean; adibidez, Hamaiketako osasungarria egitasmoa. Asteburuan Bergaran egindako Gozo Topaketetan izan ziren eskolako ordezkariak ekimenaren berri ematen.
