Guztira 52 lagun elkartu dira. Abraham Olano eta Santi Aiastui izan dira lehenak iristen. Poliki-poliki heldu dira gainerakoak. Mendizaleen Plaza inguruan elkartu dira. Besarkada eta bizkarreko zaplada ugari izan dira hasieran; izan ere, ez dute halakoetatik kanpo sarri elkar ikusten.
Nagusiena, 94 urterekin, Felipe Alberdi Gorroño, eta gazteenen artean Abraham Olano. "Elgetan primeran zaintzen gaituzte. Gainera, aukera izaten dugu elkar ikusi eta elkarren berri izateko", azaldu du Olanok.
Mahaiaren bueltan oraingo kontuak baino lehenagokoak gehiago izango ote diren galdetuta Alberto Leanizbarrutiak ez du zalantzarik. "Denetik pixka bat, baina esango nuke gure garaikoak gehiago izango direla".
Elgetako Mendi Kriteriuma antolatzen zuen taldeak prestatzen du bazkaria. Mahaian jarri aurretik talde argazkia atera dute Elgetako arkuan. Ondoren, bete egin dute Intxorta elkarteko beheko jangela.
Hurrengo asteko Hemen Debagoiena telebista saioan izango duzue ikusgai Goienak gaur grabatutako erreportajea.
