Bolatokiko skate pistaren ondoko lautadan egiten dute San Juan sua elgetarrek eta ekintza nagusiak martxan zirela herriaren beste aldean, Torrealdea auzoan, sua piztu zen. Eraikitzen hasi eta obra amaitu barik abandonatuta dagoen eraikinetik ke trinko bezain beltza irteten hasi zen. Suhiltzaileak eta Ertzaintza bertaratu ziren eta sua itzaltzeko lanetan aritu ziren.
Eraikin barrutik zarata handiak entzun ziren eta une batean eztanda bat ere bai. Ertzaintzatik jakinarazi dute gaur ziklomotor batek hartu zuela sua, eta ez dela kalte pertsonalik izan. Gaineratu dute ikerketa zabalik dela.
Ez da lehenengo aldia
Ez da lehenengo aldia Torrealdeako eraikin horretan halako ezbeharrak gertatzen direla. Eraikinaren estruktura edo eskeletoa egindakoan lanak bertan behera gelditu ziren, eta hesituta egonda ere bada sartzen denik. Ikerketa esango du oraingo honetan zer eta zergatik gertatu den.
