Plastikoak jaso zituzten gehienbat, baina baita ere botilak, jostailuak, erruberak, hoditeri zatiak... Garbiketa lanak egitearekin batera ekimenak balio izan zuen erreken eta oro har ingurugiroaren inguruko sentsibilizazio eta kontzientziazio lana egiteko.
Elgetako Gazte Asanbladak, Kantsatzeke Mendi Taldeak eta Elgetako Udalak elkarlanean antolatutako ekintzan 35 bat lagun elkartu ziren auzolanerako. Poltsetan igo zituzten errekatik ateratako zaborrak eta bi edukiontzi bete zituzten. Luntxarekin eman zioten amaiera ekimenari.
Debagoiena mailan bigarrenez deitutako auzolan deialdi bateratuaren barruan kokatu behar da ekimena. Bailarako herri guztietan egin zen auzolana eta 600 bat lagunek hartu zuten parte.
