Psikomotrizitate gelan kokatu zen jangela baina: "Ez zegoen ez aulki ez eserlekurik, eta aldameneko gelatik hartzen genituen egunero. Amaitutakoan, denak ondo garbitu eta berriro itzuli behar genituen bere lekura. Sukaldea ere erdipurdi zegoen. Iturria irekitzen zenuenean, harraskak gainezka egiten zuen, eta ontziak haurren komunean garbitzen genituen", azaltzen dute Urzelaik, Castrok eta Deskargak.
Lan baldintzei dagokienean ere ez zitzaizkien egiten zituzten ordu guztiak aitortzen. Bina orduko dedikazioa bakarrik aitortzen zieten, eta ez zuten orain moduan jangelako menurik bazkaltzeko eskubiderik.
Lan handia egindakoak
Zailtasunak zailtasun lan handia egiten dute eta Elgetako umeen haurtzaroan leku berezia dute zalantzarik gabe Urzelaik, Castrok eta Deskargak. Bazkaria emateaz gainera, 2 urteko umeak siestara eramaten dituzte, eta jolastokiko zaintza lanak ere egiten dituzte. "Inoiz-edo etorri izan dira ikasle ohiak bisitan. Ilusio handia egiten du".
Bereziki gogoan dituzte elur-egunetan zerbitzua emateko baserritik oinez etorritako egunak. Gertatu izan zaie, baita ere, lanera heldu baina janaririk ez iristea. "Batean, hotelean prestatutako makarroiak jan zituzten umeek". Uste dute, bestalde, oraingo umeek ez dutela lehengoek moduan jaten. "Saltxitxak eta pizzak eskatzen dituzte. Porru-patatak, esaterako, ez dituzte ikusi ere egin nahi".
Irribarrea ahoan kontatzen dituzte eguneroko gorabeherak. "Guk ez dugu zigortzen; umeak pentsatzera bidaltzen ditugu. Baina gaurko umeek segituan pentsatzen dute, eta hurrengo egunean berdin. Bezperan bizkorregi pentsatu zutela esaten diegu, eta beste pixka bat pentsatzeko. Horrela ibiltzen gara gu".
Gaurko urtemuga eskolako komunitate osoak ospatuko du. Urzelai, Castro eta Deskargarendako are bereziagoa izango da akaso.
