Elgetako Udalak antolatuta, energia krisiari buruzko hitzaldia egingo dute Goiener kooperatibako bi kidek eguaztenean. Oier Etxebarria eta Leire Astigarraga izango dira hizlariak, eta saioa 18:30ean hasiko da, Espaloia kafe antzokian. Energia krisiaren gakoak eta etorkizuneko aukerak izango dituzte hizpide. "Hitzaldian fakturaren igoeraren arrazoien inguruan arituko gara, eta autokontsumoaren aukeraz eta energia komunitateei buruz hitz egingo dugu", aurreratu du Etxebarriak.
Iaz Elgetan egindako Aste Berdea jardunaldietan ere izan zen Oier Etxebarria. Orduan, berriztagarria den energiari buruz aritu zen, etxeko kontsumo energetikoari eta autokontsumoari buruz. Ordutik hona, gora egin du energiaren prezioak; batez ere, argindarraren kasuan.
