Testigantzetan oinarritzen da Mendian hil hirian hil dokumentala. Debagoieneko Ospitaleko zainketa aringarrietako medikua den Iñaki Peñak idatzi eta zuzendu du Artemanekin elkarlanean.
Dokumentalak heriotza eta dolua ditu hizpide, eta mendian gertatutako heriotzetan jarri du fokua. "Bat-bateko heriotzak izaten dira, traumatikoak, eta jende gaztea izaten da. Dolu horiek bereziak dira", azaldu du. Felipe Uriartek, Juanjo San Sebastianek, Mikel Crespo aretxabaletarraren senitartekoek eta Andoni Ormazabalek eman dute lekukotza. Doluan aditu Izaskun Andonegik gaineratu du marko teorikoa.
Lanak euskarazko film onenaren saria eskuratu zuen Mendi Film Festival-en, eta Elgetako Udalak Kantsatzeke Mendi Taldearekin elkarlanean antolatutako emanaldia da. Sarrera doan da, eta ez da aurrez erreserbarik egin beharko. 18:00etan zabalduko dute aretoa, eta 80 lagunendako lekua dago.
Karakorum erakusketa
Gaur iluntzetik aurrera, berriz, zabalik da Mikel Alonsoren argazkiekin egindako Karakorum erakusketa. Zeramika gelan izango da ikusgai domekara arte. Kantsatzeke Mendi Taldeak Udalarekin eta Baltistan Fundazioarekin batera antolatutako erakusketa da.
