Udalak, Baltistan Fundazioak eta Kantsatzeke Mendi Taldeak elkarlanean antolatuta, Karakorum argazki erakusketak eguenean, hilak 20, zabalduko ditu ateak. 2014ko irailean Pakistango Hushe haranera Mikel Alonso argazkilari bilbotarrak Baltistan Fundazioko langile boluntarioekin batera egindako bidaian ateratako argazkiak dira.
Aurpegiak eta begiradak nabarmentzen dira. Hain zuzen ere, Baltistan Fundazioak elkartasun-lan garrantzitsua egin du azken hamasei urteotan, batez ere, emakumeen sustapenerako eskolak eta zentroak sortzeko. "Emakumeek gizartearen tirania naturaltasunez onartzen dute, destinoaren ezinbesteko patua balitz bezala. Goizeko lauretan jaikitzen dira eta atsedenik gabeko hemezortzi orduko lanegun luzeak egiten dituzte. Beraiei dagokie haurrak eta zaharrak, soroak eta etxeko abereak zaintzea. Baita ura bildu eta garraiatzea ere", azaltzen dute Baltistan Fundazioko arduradunek. Argi dute hezkuntza dela emakumeek beren eskubideen kontzientzia hartzeko eta horiek erabiltzen hasteko giltza.
