Positibo berririk ez aste bukaeran, eta Elgeta eremu gorritik kanpo geldituko da bihar

Larraitz Zeberio Lekuona 2021ko mai. 3a, 12:42

Osasun Sailak publikatu berri duen txostenaren arabera barikutik domekara bitartean egindako probek ez dute herrian kasu berririk atzeman. Herria eremu gorritik kanpora gelditzen da, eta itxiera perimetrala bertan behera gelditzen da. Udalak jakinarazi du, bestalde, ludoteka zerbitzua zabalik izango dela gaurtik aurrera ohiko ordutegian.

Aste bukaeran egindako probek ez dute koronabirus kasu berririk atzeman Elgetan. Hala, azken positiboak aurreko asteko eguaztenekoak dira. Lau izan ziren.

Intzidentzia-tasa metatuari dagokionez aldaketarik ez; 972,59 da gaur egun.

Behera egin duten baloreak birsorkuntza-tasa eta Elgetari dagokion osasun eremuan dagoen intzidentzia-tasa dira. Birsorkuntza-tasa 1,57 da gaur egun (barikuan 3,67 zen). Elgetari dagokion ESI Debagoiena osasun eremuaren intzidentzia-tasa, berriz, 796,04 da (barikuan 830,65 zen).

Itxiera perimetralik ez

Gaur eguneratu dute udalerrien ebazpena, eta itxialdi perimetrala ezarrita daukaten herrien zerrendatik kanpo gelditu da Elgeta. Bihar sartuko da indarrean neurri aldaketa. Hala, malgutu egingo dira hainbat neurri, tartean mugikortasuna, ostalaritzari ezarritako murrizketak eta barruetan kirol jarduerak egiteko baldintzak. 

Bost mila biztanletik beherako herrien kasuan, hiru baldintza betetzen direnean ezartzen da itxiera perimetrala. Uneotan, bi betetzen ditu Elgetak baina ez hirurak. Azken zazpi egunetan ez dira lau kasu positibotik gora egon dira –lau egon dira–. 

  • Intzidentzia-tasa metatua 400dik gorakoa da –972,59–.
  • Dagokion osasun eremuan intzidentzia-tasa 400dik gorakoa da: ESI Debagoienan 796,04 da.
  • Azken zazpi egunetan EZ da lau kasu positibotik gora egon –lau egon dira–. 

Astebetez izan da eremu gorrian eta itxiera perimetralean Elgetan. Bihartik aurrera duela bi asteko baldintzak izan dira herrian bai barruko kirol jarduerari dagokionez, bai mugikortasunari dagokionez eta bai ostalaritzari dagokionez. Hala, taberna eta jatetxeek ez dituzte barruak itxi beharko. "Hala ere elkar zaintzen jarraitu behar dugu!", adierazi dute Udaletik.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak