Ia hiru hilabetean ez da kasu positiborik atzeman, Elgeta. Osasun Sailak urtarrilaren 27an komunikatu zuen azkenengoz kasu bat herrian. Horren aurretik bi positibo izan ziren abenduaren 29an, eta beste bat abenduaren 27an.
Atzo egindako proben ondorioz, ordea, hiru kasu baieztatu dira, eta ia hiru hilabetez hutsean izan den intzidentzia-tasa metatua 265, 25 da gaur.
Gaur baieztatutako kasuak kontuan hartuta 54 positibo erregistratu dira Elgetan pandemia hasi zenetik.
Laugarren olatua eragin handia izaten ari da Gipuzkoan, eta Debagoienean ere bai. Elgetan apenas izan du eraginik gaur arte, baina hasi dira positiboak agertzen. Murrizketak eta osasun neurri bereziak betetzeko eskatzen dute Osasun Sailetik. "Elkar zaintzen jarrai dezagun!", adierazi du Udalak sare sozialen bitartez.
Gogoan izan gorri daudela inguruko herriak ere, hala nola, Bergara, Eibar, zein Elgetak mugakide duen Bizkaia lurraldea. Hala, mugikortasun neurriek ezarritako salbuespenak kenduta Eibarrek itxiera perimetrala du, eta lurralde arteko mugimendua ere –Gipuzkoa, Bizkaia, Araba– murriztuta dago.