Bederatzi erabiltzaile eta bi hezitzaile ditu Elgetako ludoteka zerbitzuak, eta aste egunez arratsaldero zabaltzen ditu ateak. Azken aldian kanpoko aldean dagoen izei handia apaintzeko zereginean ari dira, besteak beste.
Puntu moreak jarri zizkioten lehenengo. Emakumeen Kontrako Indarkeria Matxistaren Aurkako Egunean lanketa berezia egin zuten eta aldarrikapen egunarekin bat egiteko modua izan zen.
Gerora etorri ziren Euskaraldiarekin lotutako puntu koloretsuak eta Ahobizi zein Belarriprest ikurrak. 16 urtetik beherakoak dira zerbitzuko erabiltzaile guztiak, baina badute Euskaraldiaren berri eta horrela adierazi dute.
Euskararen Egunerako beste ekintza bat dute prestatua. Papiroflexia ariketa egin eta paperezko hegaztiak egingo dituzte. Hain zuzen ere, kurriloak. Erabiltzaile bakoitzak bat egingo du eta euskararekin lotutako esaldi bana idatziko dute bertan. Ludotekako sarrerako sabaitik zintzilikatuko dituzte guztiak.
Euskaraldiaren kantua osatzeko jokoa
Gogoratu martxan dela Euskaraldiaren kantua osatzeko jokoa. "Euskaraldiko kantuaren estrofak banatu ditugu herrian zehar. Paper zatiak dira eta aurkitzen dituenak udaletxeko helbide elektronikora bidali behar ditu. Ea denon artean kantua osatzea lortzen dugun", azaldu dute. Halakorik ikusiz gero jaso, atera argazkia eta bidali udala@elgeta.eus helbide elektronikora.
