Uda lehorra izan da eta horrek produktuengan eragina izan du, Arantzabalen esanetan. "Produktu asko bizkorregi etorri dira eta oso zaila da sasoian egun baterako prestatzea ortua. Ur askorekin ibili behar izan dugu, ia egunero ureztatzen, eta hori nabaritu egiten da gero".
Bestalde, pandemiak baldintzatutako azoka izan da Elgetakoa ere. “Beste urte batzuetan egon izan diren hainbat baserritar ez dira etorri aurten, adinean ere aurrera doaz eta, badaezpada". Azoka muntatzerakoan ere, zirkuitu bat egin dute eta erosleak norabide bakarrean joan dira postu batetik bestera, distantziak mantenduz. "Zailtasunak agerikoak dira eta jende kopuruari dagokionez ere, aurreko urteetan baino erosle gutxiago etorri dira. Azken batean, helburua hori ere bazen, jendea ez pilatzea, eta segurtasuna bermatzeko, hobe da jende gutxiago etortzea, eta txandaka".
Trikitilariek alaitu dute azoka
COVID-19aren eraginez, bestelako hainbat ekintza ere bertan behera utzi behar izan dituzte. "Tirolina egiten genuen azken urteetan eta Intxortako Igoera ere bai, besteak beste, eta ekintza horiek eguna janzteko balio zuten. Horren ordez, baina, atzo bertso saio bat egin genuen eta azokak iraun duen bitartean trikitilariak aritu dira giroa alaitzen". Eguraldiak ere lagundu du, hasieran, behintzat. "Zalantzan egon gara arkupeetan jarri edo ez, baina azkenean plazan jarri ditugu postuak". Ostean eraman zituzten arkupetara euriaren ondorioz.
