Zapatuan jokatuko den Aramaioko rallysprintean izango dira Mikel Beretxinaga eta Adrian Gorostiza. Urte eskasa izan da auto lasterketen munduan. "Proba gehienak bertan behera gelditu dira. Bi rallysprint eta bi rally jokatu dira. Rallyetara ezin izan dugu joan, baina Gabiriako rallysprinta jokatu genuen".
Proban, arazo mekaniko bat izan zuten autoan. "Aldaketa batzuk egin ditugu arazo hori konpontzeko eta Aramaion autoa probatu nahi dugu Gernikako proba serio lehiatzeko".
Lasterketa gosez
Aramaioko proba urteko rallysprint politenetakoa dela uste du Beretxinagak. "Jende gehien pilatzen denetakoa da, eta antolatzaileek nahikoa lan izan dute kontu horrekin. Normalean, oso leku gutxi izaten dute asistentziak eta horrelakoak egiteko. Ikusiko dugu aurten zelan moldatzen diren".
Elgetan badaude pilotu gehiago. "Gu bakarrik joango gara Aramaiora. Asierrek autoa ondo bukatu barik dauka, eta, kopa seriorik ez egotera, Oskarrek hurrengo urterako laga du".
