Atzo, martitzena, egin zuten batzarra udal arduradunek, familiek eta hezitzaileek. "Zapatuan prentsaren bidez zabaldu zuen Osasun Sailak udalekuak ixteko gomendioa eman zuela. Elgetan, ordea, udalekurik antolatu ez eta zaintza beharrak zituzten familientzako eskaintza zabaldu genuen", azaldu du Udalak.
Astelehenean eta martitzenean zaintza zerbitzua zabalik izan da eta asmoa da, oraingoz, ez ixtea. "Azken egunetan gomendioaren inguruko zehaztasunak jasotzen saiatu gara, eta gaur bertan –martitzena– familiekin eta hezitzaileekin bilera egin dugu. Zaintza zerbitzuaren inguruko gomendiorik eta dekreturik ez egonda, zaintzarekin aurrera jarraitzea erabaki dugu, orain arte ezarritako higiene eta segurtasun protokoloak jarraituz. Gurasoekin eta hezitzaileekin hitz egin bezala, osasun egoera aldatuko balitz, zerbitzua etetea baloratuko genuke, ezarritako protokoloei jarraituz".
