"Gure helburua era seguruan irekitzea da, eta horretarako lanean ari gara", esan du liburutegiko Geaxi Ezpeletak. "Irekierak araututa daude Espainia mailan eta murriztuta Euskal Autonomia Erkidegoan. Arauen joan-etorriak dezente zailtzen du egoera bideratzeko era egokiena zein izango den zehaztea".
Bien bitartean, zabalik da itzulketak egiteko buzoia. "Momentuz, itzulketa buzoia irekita egoten da kultur-etxeko atean 8:00etatik 13:00etara astelehenetik ostiralera, etxean maileguan eta erabili gabe dauden liburuak itzultzen joateko. Berriz mailegatu aurretik hamalau eguneko desinfekzio garai pasa behar dutenez hori, behintzat, aurreratzen joateko".
Gu ere kontalari saioa, sarean
Ezin denez, oraingoz, aurrez aurreko ipuin kontalari saiorik egin, etxetik egiteko proposamena egin du udal liburutegi zerbitzuak. Herriko kontalari txikiei zein handiei ipuinak, txisteak, abestiak, antzerkiak... grabatzeko eta bidaltzeko proposamena egin diete. Banaka, binaka edo taldeka egin daitezke grabazio horiek, eta baita ere heldu baten laguntzarekin.
Ideia da domekara bitartean jasotako bideoekin osatzea hurrengo Gu ere kontalari saioa.
