Ferixa Nagusiko jaiak, aurten, uztailaren 2tik 5era ospatzekoak dira, baina bistan da jaiak ez direla aurreko urteetakoak modukoak izango. COVID-19ak eragindako egoerak baldintzatuko ditu, ezbairik gabe, eta neurriak hartu beharko dira denon segurtasuna eta osasuna bermatzeko.
Jai batzordeak ez du, oraingoz, erabaki irmorik jakinarazi. Iraitz Lazkano alkatea da jai batzordeko burua, eta adierazi du gaia mahai gainean dutela. "Aztertzen ari gara batzordeetan parte hartu duen jendearekin. Hemen ere segurtasuna lehenetsiko dugu, hori bai", izan dira haren hitzak.
'Guztiok kalera' kartela
Bien bitartean, kartel lehiaketa egin du jai batzordeak, eta Juan Antonio Aguilar sevillarraren Guztiok kalera lanak irabazi du. Hala, 100 euroko saria jasoko du eta 2020ko jaietako irudi nagusia izango da.
Bederatzi kartel proposamen jaso zituen jai batzordeak, baina bi lehiaketatik kanpo gelditu ziren, baldintzak betetzen ez zituztelako. Hala, zazpi lanen artean aukeratu dute elgetarrek, eta herritarren botoek erabaki dute irabazlea. 270 boto jaso ditu jai batzordeak Internet bidez egindako inkesta bitartez, eta botoen %80,4 jaso ditu irabazleak.
