"Lan handiko egunak izan dira aurreko astekoak", adierazi du Ugari dendako Bea Bouzasek. "Martitzenera arte mugimendu handia izan dugu. Badirudi gauzak normaltasun batera itzuli direla orain".
Zenbait produktu laster agortu zitzaizkiola azaldu du: "Eskularruak, batez ere, eta amoniakoa ere bai. Jendea etxean dago eta garbitzeko aprobetxatzen ari da, antza".
Gainerakoan, betiko martxa daramala dio Bouzasek, baina hainbat prebentzio neurri hartuta. Gehienez ere bi bezero daude aldi berean dendan, eta batekin amaitutakoan eskuak garbitu eta mostradorea desinfektatzen du. "Maskara daramat, kutxan ez dagoelako metro eta erdiko distantzia mantentzerik, eta ez dudalako bezerorik kaltetu nahi".
Prebentzio neurri moduan, bestalde, bakarrik dago dendan. Ordutegia, oraingoz, betikoa da.
