Kaleak, plazak, semaforoak edota barandak modu berezian garbitzeko neurriak hartu ditu Elgetako Udalak ere. Helburua da erabilera publikoko elementuak desinfektatzea, eta horretarako ura eta lixibarekin dihardute garbiketa egiten.
Udal brigadako langileak ari dira zeregin horretan kalean. "Atzo, astelehena, hasi ginen. 07:30ak bueltan hasten gara eta egiten ditugu plaza, zabalik dauden dendak, kutxa, kioskoa eta botika. Hori da lehenengo gauza. Gero, egiten ditugu barandak eta semaforoak", adierazi du udal brigadako langile Enrike Perez Txikiturri-k.
Urarekin eta lixibarekin egindako nahasketarekin ari dira kaleak eta kaleko elementuak desinfektatzen. Gehien erabiltzen diren guneetan eta kaleko altzarietan egiten dute lan hori.
Gaur, martitzena, eguerdian ere egin dute plaza arrain saltzailea joan eta gero.
Udal eraikinetan
Udal eraikinen eta materialaren garbiketa berezia ere egiten ari da Udala. Eskola, udaletxea, ludoteka-gaztelekua, kiroldegia, kultura etxea... daude tartean. Garbitzaile taldeak dihardu zeregin horretan.
