Elgetako Emakume Taldeak elkarretaratzea deitu du domekarako, 13:00etan. Hamabost minutuko kontzentrazioa izango da, herriko plazan. Iaz moduan, bazkaria ere egingo dute. Eguraldiaren arabera, udaletxeko arkupean edo Espaloia kafe antzokian izango da.
Txartelak salgai daude herriko taberna guztietan zein Elkoro botikan. Prezioa 7 euro da, eta paella –oilaskoarena edo beganoa–, pastak eta kafea daude menuan.
Bazkalosteak tertuliarako aukera emango du. Iaz moduan, koaderno moreak ibili dira egunotan eskutik eskura, eta bertan jasotako gogoetak kafearen tartean irakurriko dituzte. Tertulia laguntzeko, argazkiak, irudiak eta ipuinak izango dira bazkalostean, eta bertaratutakoek horiek guztiak betaurreko moreekin irakurtzeko gonbidapena jasoko dute. Helburua izango da emakumeek mundu honetan duten –edo eman zaien– tokiaren inguruan hausnarketa egitea.
Herri Eskolan ere lanketa
Elgetako neska-mutikoek ere hainbat ekintza izan dituzte egunotan Martxoaren 8aren inguruko gogoeta egiteko. Eskolako sarreran ikusgai egon da Emakumeen begiradak eta eskulturak izeneko erakusketa. Alicia Gartziaren lanak dira.
Emakume taldearen koaderno moreak ere etxerik etxe ibili dira, eta nork bere gogoeta idatzita uzteko aukera izan du. Koadernoetako bat LH5 eta LH6 geletako neska-mutikoek erabili dute. Bigarrena eskolako familiendako izan da, eta etxez etxe ibili da, gurasoek ere ekarpenak egin ditzaten. Bi koadernoak plazan izango dira domekan, eta ekarpenak egiteko aukerak zabalik jarraituko du.
Bestalde, eta Herri Eskolako ekintzekin jarraituta, gaur, martxoak 6, hainbat tailer eta saio egingo dituzte adin guztietako ikasleek.
Haur Hezkuntzako neska-mutikoek berdintasuna adierazten duten argazkiekin horma-irudia egingo dute. Lehen Hezkuntzako 1. eta 2. mailetako ikasleek Garazi Arrula idazlearen eta Helena Azkarragaurizar ilustratzailearen bisita izango dute. Bidean izeneko liburua aurkeztuko dute eskolan.
Hirugarren eta laugarren mailetako neska-mutikoek buztin tailerra egingo dute, eta beraien ekarpena egingo diote eskolako atarian dagoen erakusketari.
