Feminismoaren historia ezagutzea izango da lehenengo saioaren xede nagusia, ezta?
Genealogia feministen kontzeptuak zer esan nahi duen azaltzen saiatuko naiz, bai. Genealogia kontzeptua erabiltzen dut beste askok egindako lan mordoaren ondorioz gaudelako gu gauden egoeran eta lekuan. Askotan, ematen du feminismoan hutsetik hasten garela, eta ez da horrela. Uste dut interesgarria dela mendeetan atzera egin, eta feminismoan izan diren eztabaida eta mugarri nagusiak identifikatzea. Egile, testu eta gogoeta esanguratsuenak ezagutu, eta mugimendu feminista ezaugarritu duten olatuak kokatuko ditugu. Modu parte hartzailean, mugimendu feministaren historian jorratu diren gaiak landuko ditugu, eta kronologia batean kokatzen saiatuko gara. Denon artean feminismoaren genealogia bat egiten saiatuko gara.
Bigarren saioa martxoaren 4an izango da. Helburua izango da genealogia luze horretan nork bere burua nola kokatzen duen hausnartzea, ezta?
Hausnarketa saio bat izango da gehiago. Ez hainbeste helburuak finkatzeko asmoarekin, baizik eta Euskal Herriko eta Elgetako errealitatean lur hartzeko asmoarekin. Zergatik antolatzen gara? Zertarako antolatzen gara? Askotariko ariketen bidez emakume ginela noiz konturatu ginen, eta emakumeen eskubideen alde nola kokatu ginen partekatuko dugu. Baina, batez ere, zergatik antolatzen garen galdetuko diogu gure buruari. Gure asmoak eta nahiak antolatzen eta definitzen saiatuko gara.
Martxoaren 8an, elkarretaratzea eta bazkaria
Emakumeen Nazioarteko Egunean elkarretaratzea eta bazkaria egingo dira Elgetan. Elkarretaratzea 13:00etan izango da, eta bazkaria 14:30ean. Menua da: paella – oilaskoarekin zein beganoa–, postrea eta kafea. Prezioa 7 euro da. Txartelak salgai daude, martxoaren 6ra arte, herriko taberna guztietan eta Elkoro botikan.