"Eusko Jaurlaritzatik ez eta Foru Aldunditik ez dugu berri ofizialik jaso. Dakigun guztia sare sozialen bitartez jaso dugu", aipatu du Lazkanok. Gaineratu duenez, "Elgeta hirigunea Eitzagako zabortegitik lau kilometrora dago; Zaldibar hirigunea baino gertuago", azaldu du.
Elgetan usaina "nabaria da", eta ez dakite esaterako, "aire librean kirola egin dezakegun"; inguruko herrietan Osasun Sailak ohartarazi baitu aire librean kirolik ez egiteko. "Azken berriekin jendea arazoaz konturatu da, hau da, zer suposatzen duen aire libreko zabortegi bat izatea arazoen iturria".
Elgetako Udalak atzo goizean, otsailak 14, jakinarazi zien herritarrei airean egindako neurketen emaitzak "normalak" zirela. Informazio hau udalak herritarrei helarazi zien Osasun Sailak airean dioxina eta furano maila altuak zeudela jakinarazi aurretik. Izan ere ostegunean Osasun Sailak berak jakitera eman zuen, Elgetako hainbat puntutan neurketak egin ostean, "hirigune baterako emaitza normalak zirela".