Udal liburutegitik emandako datuen arabera, 2019an 1.862 liburu mailegatu ziren Elgetan. "Erabiltzaile kopurua mailegu kopurua baino handiagoa da", adierazi du liburutegiko arduradun Geaxi Ezpeletak. "Iaz, 3.000 pertsona inguruk erabili zuten zerbitzua: irakurtzeko, mailegu zerbitzua erabiltzeko, etxeko-lanak egiteko, kontsultak egiteko, ordenagailuak erabiltzeko, eta abarrerako".
Gaztelerazkoak baino euskarazko liburu gehiago hartu ziren maileguan. Euskarazko liburuen maileguak 1.003 izan ziren, eta gaztelerazkoenak 740. "Gainontzekoak, beste hizkuntza batzuetan edo ele bitan", zehaztu du Ezpeletak.
Hizkuntza irizpidearekin lotuta adierazgarria da batez ere neska-mutikoak direla euskarazko liburuak maileguan hartzen dituztenak. Helduen artean gaztelera da nagusi.
2019an, euskarazko liburu mailegatuenak Daniela pirata, Tonino eta Kokoriko izan ziren. Gaztelerazko liburu mailegatuenak, berriz, Reina roja, La rosa del viento eta Las hijas del capitán izan ziren. Argi dago euskaraz haur ipuinak mailegatzen direla, gehienbat, eta helduendako eleberrietan, berriz, gaztelera dela nagusi.
Emakumezkoak gehienak
Orokorrean, liburutegiko erabiltzaileen gehiengoa emakumezkoa da. Neska-mutikoen artean ere bai. "Iazko mailegu datuetan, gutxi gorabehera, bi heren emakumeek egindako maileguak izan ziren eta heren bat gizonezkoek egindakoak", zehaztu du liburutegiko arduradunak.
Liburu mailegua ez da urte osoan zehar bera izaten. Elgetari dagokionez eta 2019ko datuei erreparatuta, mailegu kopuru handieneko hilabeteak uztaila, urria, azaroa eta urtarrila izan ziren. Mailegu kopuru txikiena, berriz, udaberrian.
