Hasita daude Elgetan ere pinudietako banda marroiaren eta gorriaren kontrako tratamenduak erabiltzen. Legezkoa da Gipuzkoako Foru Aldundiak emandako baimenarekin oxido kuprosoa erabiltzea, baina baldintza jakin batzuk bete behar dira: lurretik eta herrigune zein ur ibilguetatik ehun metrora botatzea, gutxienez, eta euririk ari ez duenean eta haize gutxi dabilenean izatea. Gainera, 25 urtetik beheragoko pinuak jaso dezakete tratamendua eta afekzioa %75 baino gutxiagokoa bada.
Aramaioko Oleta aldean eta Eskoriatzan hainbat pinudi tratatu dituztela ere jakin du Goienak.
Tratamendu esperimentala Aramaion, besteak beste
Bestelako tratamendu batekin esperimentatzen ari dira Neiker-Tecnalian. Nekazal ikerketarako eta garapenerako institutuak eguaztenean publiko egin zuenez produktu berriak erabiliko dituzte, besteak beste, krustazeo oskolak, soja lezitina eta garagar-legamia.
Jakinarazi dute hasiera batean 174 hektareatan aplikatuko dutela tratamendu berria, tartean Aramaion.
Lurreko entsegua 24 hektareatan egingo dute: zortzi hektarea Murgan –Araba–, zortzi hektarea Artzentalesen –Bizkaia– eta zortzi hektarea Beasainen –Gipuzkoa–.
Airetik 150 hektareatan botako dute: helikopteroarekin 90 hektarea Amoroton –Bizkaia–, eta dronakin 60 hektarea Luiaondon eta Aramaion –Araba–, eta Idiazabalen –Gipuzkoa–.