2019ko udal aurrekontuaren inguruan egiten duten balorazioa eskatuta oposiziotik adierazi dute agintaldiko aurreko urteetan egindako balorazioaren oso antzekoa dela aurtengoa ere.
"Onartzen dugu egoera ekonomikoak ez duela askorako ematen, eta horregatik aurkeztutako aurrekontuak oso teknikoak dira. Pertsonalaren gastuak eta mantenu gastuak ordaindu beharrekoak dira, eta kopuruak matematikoki irteten direnak dira", azaldu du Mikel Larrea bozeramaileak.
"Inbertsioetako gastu gehienak —6. kapitulukoak— ez dira inbertsioak mantenu gastuak baizik. Aurrekontu honek ez du erakusten etorkizunerako bidea. Ez daukagu argi nora bideratzen duten Elgetaren etorkizuna".
Gaineratu dute ez dela elkarlanean landutako aurrekontua.
