Olentzerok domeka iluntzean jasoko ditu Elgetako neska-mutikoen eskutitzak

Olentzero, iaz, Elgetan.

Herri Eskolako ikasleek bariku goizean egitekoa duten azoka txikiarekin hasiko dira Gabonetako ekintzak, herrian.

Askotariko produktuak eskainiko dituzte eskolako umeek plazan, barikuan, 09:30etik 11:00etara. Haien eskutik etorriko da Gabon giroa. Arratsaldean, udal ordezkariek eta erretiratuek urteroko bisita egingo dute Bergarako Mizpirualde egoitzara.

Ludotekan, berriz, Gabonetako tailer irekiak egingo dituzte egunotan. Bihar, eguena, 2-6 urte bitarteko neska-mutikoendako egongo da zabalik zerbitzua,17:00etatik 19:00etara. Barikuan, berriz, 7-12 urteko umeen txanda izango da.

Herriko musika ikasleek ere barikuan egingo dute Gabonetako emanaldi berezia, Espaloian. 19:00etan hasiko da.

Olentzero eta Gabon kantak

Domekan, hilak 23, jaitsiko da Olentzero Intxortatik eta 18:30ak aldera iritsiko da. Aurretik, neska-mutikoendako apaingarriak egiteko eskulan tailerra dago antolatuta plazan. Olentzero eskutitzak jasotzera eta Elgetako neska-mutikoekin elkartzera etorriko da. Urteroko bisita du eta aurten ere egingo duela iragarri du.

Astelehenerako, hilak 24, Gabon kantak abesteko gonbidapena luzatu dute Maala guraso elkartetik. Taldea 11:00etan abiatuko da Herri Eskolatik, eta eguerdian txorizoa eta salda banatuko dituzte plazan.

Kantsatzeke mendi taldetik Eguberri egunerako egin dute proposamena. Intxortara igotzeko plana egin dute plazatik 11:00etan abiatuta. 11:30ak bueltan txorizoa banatuko dute tontorrean.

Liburutegitik, azkenik, Liburu bat opari lehiaketa antolatu dute. Lehiaketa berria da eta arauak ikusgai daude udal liburutegiaren webgunean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.