Pintxo landuak aurkeztu dituzte lehiaketara Maialde landetxeak, Rincon de Lola jatetxeak eta Bolatokia zein Haizea tabernek. Epaimahaiko hiru kideak tabernaz taberna ibili dira guztiak dastatzen eta baloratzen. Hain zuzen ere, epaimahaia osatu dute Pedro Mari Uberak (Xalbadorpe erretiratuen elkartea), Enara Merinok (Maala guraso elkartea) eta Ainhoa Zeziagak (Elgetako emakume taldea).
Lau pintxoak baloratu eta antolatzaileek puntuen batuketa egin dutenean berdinketa bat egon da. Orduan, zaporearen atalean lortutako puntuazioak erabaki du, eta Haizea tabernako Haize goxua pintxoa izan da irabazlea.
Bittor Gallastegik eta Haizea tabernako lan taldeak 14:15ak bueltan jakin dute epaiaren berri, Jainaga eta Narbaiza trikitilariak tabernan sartzen sumatu dituztenean. Atzetik zetozen epaimahaiko kideak irabazleari dagokion txapelarekin, eta lehiaketako antolatzailea den Elgetako Udalaren ordezkariak.
"Ez genuen saria espero, eta beti da pozgarria. Saiatzen gara lehiaketarako zerbait txukuna egiten. Etxeko guztien artean joan gara Haize goxua pintxoa sortzen. Gustukoa izan bada, gu pozik", esan du Gallastegik txapela jantzi eta gutxira.
Egunean zehar bestelakoak ere izan dira Elgetan, gaur. Emakumeen Master Cup Txapelketako kanporaketak jokatu dira goizean frontoian eta Jose Antonio Ojangurenek argazki erakusketa zabaldu du zeramika gelan. Euskaraldia batzordeak ere gaur ekin dio ahobizi zein belarriprest txapen banaketari.
Publikoaren saria hurrengo domekan
Hurrengo domekan berriz eskainiko dituzte lau pintxoak lau tabernetan, eta publikoak izango du hitza. Pintxoek zein osagai duten asmatzeko lehiaketa ere izango da aurten. "Gure pintxoak badu osagai sekretu bat", aurreratu du Gallastegik.