Batzuk isilean eta beste batzuk prestatzen ari diren mozorroa lau haizetara zabalduz, baina gaur izango da irudimenak eman duena erakusteko eguna Elgetan.
Herri Eskolako neska-mutikoek eta irakasleek 15:00etarako iragarri dute mozorro kalejira. Eguraldi ona bada ikastetxetik abiatuko dira eta plazan amaituko dute. Bestela, frontoian egingo dute jaialdia.
Maala guraso elkarteak txokolate-jana eskainiko du 16:30ean, eta Udalak I&D jaialdia iragarri du 17:00etarako. Euskal diskofesta izango da. Musika jartzailea eta dinamizatzailea etorriko dira. Elgetako buruhandiek ere ez dute Inauterietan hutsik egingo eta 18:30ean izango dira neska-mutikoekin zezena, txintxon, lehoia.
Erretiratuek martitzenean
Xalbadorpe erretiratuen elkartetik jakinarazi dute martitzenean ospatuko dutela Inauteria.Txokolate-jana eta bingo saio iragarri dituzte, 17:00etan, Ozkarbi elkartean. Bazkide guztiak daude parte hartzera gonbidatuta.
