Baratze Parke Sarearen aurkezpena, herriko auzo-konpost guneen gaineko azterketa, Gipuzkoa Zero Zaborren hitzaldia... egitarau zabala izan du Aste Berdeak, eta bariku arratsaldean umeei zuzendutako ekintzak izan dira nagusi.
Hondakinak batzeko zenbat edukiontzi dauden ikasi dute txikienek. Hondakinen irudiak margotu, moztu eta edukiontzi ezberdinetan itsatsi dituzte. Dinamikoagoa izan da bigarren jokoa: ilaran ipinitako hondakin sorta jaso eta nor bere koloreko edukiontzian zuzen lagatzea, alegia.
Zenbait hondakinekin zalantzak izan dituzte neska-mutikoek, batez ere hasieran. Jolasaren bitartez, ordea, hondakin bakoitza dagokion koloreko edukiontzian kokatzen ikasi dute.
Zero zabor erakusketa
Nagusiagoendako bost panelez osatutako erakusketa egon da ikusgai. Informazio ugari azaltzen zen bertan, tartean zaborrik onena sortzen ez dena dela, eta ahalegina eginez gero hondakinen %90 berrerabil daitekeela.
Konpost prozesuaren gaineko erakusketa ere ipini dute Elgeta Zero Zabor taldekoek. Konposta nola egin eta zertarako erabili azaltzen zen bertan.
